تورکجه متن
گونئی آذربایجان تورک میللتی نین اؤز موقدراتینی تعین ائتمه حاقی اوغروندا آپاردیغی موجادیله نین ائله بیر حساس گونلری ایچینده ییک کی بو گونلر دونیا و بؤلگه دیپلوماسی سینین ایران علیهینه دؤندوگو بیر زامانا و اؤلکه داخیلینده ایرانین گئریچی-شوونیست حاکیمیتینی ییخیلما آشاماسینا گتیرن سیاسی، توپلومسال و اکونومیک درین دگیشیملره راستلاماقدا‌دیر. هئچ شوبهه‌سیز بو دورومدا آذربایجانین یورد ایچی و دیشیندا کی شخصیت و قورولوشلارینین هر چئشید یاخینلاشما و بیر آرایا گلمه سی و آذربایجانین ان تاثیرلی سیاسی قووه سی اولان آذربایجان میللی حرکتینین سیاسی- میللی چیخارلاری اوزرینده اوداقلانما‌لاری آذربایجان میللی حرکتینین باشاری و ظفر رمزی ساییلا‌جاقدیر.
آذربایجانیمیزین وطندن اوزاق قالمایا مجبور بوراخیلان اؤولادلارینین 21 آذر 1324 (میللی دؤولتچیلیک و تورک دیلینین گونئی آذربایجاندا رسمی اولدوغو گون) کیمی قوتلو بیر گونده آمستردام شهرینده بیر آرایا توپلانا‌راق فیکیر آلیش وئریشی و میللی حرکتین سورونلارینا چیخیش یوللاری آختارماقلا بیرلیکده وطنده اسارتده اولان باجی قارداش‌لاری و گونئی آذربایجاندا دوام ائدن میللی موجادیله ایله بیرگه لیکلرینی و دستکلرینی بیلدیرمکلرینی گؤرمک و ائشیدمک سون درجه سئویندیریجی بیر حالدیر.
یقین کی آمستردام توپلانتیسی بو چئشید توپلانتیلارین ایلکی و سونو دئگیل‌دیر. آما بو توپلانتی قارشیمیزدا اولان پروبلئملرین حللی اوچون اویغون بیر زمین و اؤزللیکله خاریجده یاشایان قووه لریمیز و طیفلریمیزین یاخینلیغی و بیر آرایا گلملری اوچون اؤنملی بیر آددیم اولا بیلر.
آذربایجان میللی دیرنیش تشکیلاتی اینانیر کی، آذربایجان اؤولادلارینین اولوسلارآراسی پلاتفورمدا بیلیمسل و عملی اورگانیزه چالیشما‌لاری اولمازسا آذربایجان میللی حرکتی اؤز دوغال گلیشمه سورجینی تاماملایا بیلمه یه جکدیر و ائتکیلی بیر لابی چالیشماسی و اولوسلارآراسی حیمایه قازانماق حرکتین ان تمل احتیاجلاریندان‌‌دیر.
عزیز یولداشلار؛
بعضی ضرورت و حساسیتلری گؤز اؤنونده بولوندورا‌راق لازیم گؤروروک کی بعضی اؤنملی و دیقت ائدیلمه سی گرکن مساله لری، قوتسال یوردوموز گونئی آذربایجانین ایچریسیندن، قوللوغونوزا چاتدیراق.
آذربایجان میللی دیرنیش تشکیلاتینین فیکرینجه، آذربایجان میللتینین سیاسی گوجو اولان آذربایجان میللی حرکتینین ایستیقلالینی قوروماق و اونو وورغولاماق هر زامان باشاری و ظفرین ان تمل شرطلریندن اولوبدور. اؤزللیکله بو گونکو دورومدا میللی حرکتین باغیمسیزلیغینی قوروماغا و صفلرینین داها دا مؤحکملشدیرمسینه آرتیقراق بیر احتیاج دویولماقدا‌دیر. ائله نچی بیر شرایط ایچینده ییک کی، شووئنیزم جبهه سی خصوصی ایله “یاشیل حرکت” آدلانان جریان، خاریجی حیمایه لر، ایرانین مافیایی-سانترالیستی سیستئمی واسیطه سی ایله قازانیلان مشروعیت‌سیز ثروتلر، خاریجده کی فارس اوپوزیسیونونا باغلی مئدیانین تام دستگی وه بعضا گرچک اولمایان و جایدیریجی مظلومچولوق اویونو ایله دونیا هامی اویونو (افکاری عومومی) بؤیوک اؤلچوده اؤز یانینا چکمگه نایل اولوب و ایران نوفوسونون یوزده آلتمیشلیق بیر چوخونلوغونا اویغولانان میللی ظولوم کیمی بؤیوک بیر گرچگی گیزله یه رک دونیایا گرچکده وار اولان ایراندان داها فرقلی بیر ایران سونماغی باشارمیشدیر. بو قوشوللار آلتیندا و میللی حرکتیمیزین ده، بعضی نقصان‌لاردان دوغان، سؤزده رئفورمیست جریانلارا قیاسلا داها قیستلی ایمکان و عمل ساهه سینه مالیک اولدوغونو دیقته آلا‌راق بیلمک لازیمدیر کی، میللی حرکت ایله شووئنیزم جبهه سی خصوصی ایله سؤزده ایصلاحاتچی جریانلارین صفلرینده هانسی سا بیر تداخول و قاریشیقلیق، او جریانلارین له ینده میللی حرکتین گوجو و پتانسیل یندن سو ایستیفاده و یانلیش قوللانیم فورصتی یارادا بیله جکدیر.
یالنیز تاسوفلر اولسون کی، آذربایجان میللی حرکتینه منسوب اولان بعضی قووه لر کئچمیشدن درس آلما‌دان و ایچینده اولدوغوموز شرطلری دوغرو آنالیز ائتمدیکلری ندنی ایله میللی حرکتدن فرقلی بیر ماهیت و رسیم سونمایا چالیشیرلار. بیر سیرا چابا‌لار سورمکده‌دیر کی، آذربایجان میللی حرکتینین مرکزده کی جریانلارلا پارالل و عینی یؤنده اولدوغونو ایما ائتمگه و یا میللی حرکتی او جریانلارا طرف چکمگه چالیشماقدا‌دیر. بو شخصلر ایسلام جومهوریتی رئژیمینی، مرکزچی جریانلارا حاکم اولوب ایران قالیبینده تظاهور ائدن شووئنیست- راسیست دوشونجه آلتیاپی‌سینین یئرینه قایا‌راق بالفعل کئچمیشده کی سهولری تکرارلاماق ایسته ییرلر. بو شخصلر ایسلام جومهوریتینی دئویرمک هدفینی اؤز موقدراتینی تعین ائتمک حاقی نین یئرینه قویماغا چالیشیرلار. او دا، رئژیمدن داها شوونیست و عیرقچی اولان و ایراندا یاشایان فارس اولمایان میللتلره کسینلیکله یاشام حاقی تانیمایان جریانلارلا بیرلشه رک و یا اونلارلا پارالل حرکت ائدرک.
آذربایجان میللی دیرنیش تشکیلاتینا گؤره آمستردام توپلانتیسی گونئی آذربایجانداکی میللی موجادیله نی اله آلماق اوچون بوتون میللی حرکت قووه لرینه اویغون بیر اورتام اولا بیله جگی ایله عینی زاماندا بو توپلانتینی قوران و یؤنلندیرنلرین یوخاریدا قئید ائدیلن تهلوکه‌لی دوشونجه لرین گوندمه گلیب مشروعیت قازانماسینا قارشی دیقتلی اولما‌لاری لازیمدیر.
آذربایجانین سون اون ایللیک گئدیشاتی، آذربایجاندا جریان ائدن میللی موجادیله نین آچیق توتوم‌لاری و اؤز سینیرلارینی نئت شکیلده بللی ائتمه سی، آذربایجان میللی حرکتینین سیاسی و فیکری اولغونلوغونو تام آنلامییلا اورتایا قویموشدور. جومهورباشقانلیغی سئچکیلریندن سونرا یاشانان اولایلاردان آذربایجانین اوزاق دورماسی و دستک وئرمه مه سی، گئریچی- شووئنیست رئژیمین جومهورباشقانینین تبریزه سفری اثناسیندا آذربایجانلیلارین اونو سویوق و رنگسیز بیر بیچیمده قارشیلاماسی و هابئله فوتبال ایستراتژیسی آدلاندیرا بیله جگیمیز سیاسی- ایدامسال حرکتلر آذربایجان تورک میللتی اؤزللیکله آذربایجان گنجیلیگی ایچینده موستقیل میللی دیرنیش روحیاتی و دوشونجه سینین یئرلشدیگینین ان آچیق ثبوتودور. بو حادیثه لر حاکم موحافظه کار قاناد، سؤزده رئفورمیست موخالفت قانادی و خاریجده کی فارس اوپوزیسیونونا عینی اؤلچوده معنا‌لی و شوک وئریجی‌دیر. بو ندنله ده بوتون فعالیتلرده، اوتوروملاردا و کونفرانسلاردا آذربایجان میللتینین سیاسی قرار وئریجی گوجو اولان آذربایجان میللی حرکتینین سیاسی باغیمسیزلیغینی گؤسترمک و اونو وورغولاماق دانیلماز بیر اؤنمه صاحب‌دیر و اونون تثبیتی اوچون ده چابا گؤستریلمه‌لیدیر.
آمستردام توپلانتی‌سینی قوران عزیز باجی و قارداشلاریمیز؛
بیر سیاسی حرکتین ایستکلرینین اولوسلارآراسی پلاتفورما داشینماسی، یورد ایچینده موجادیله وئریب حبسخانا‌لاردا یاتان موباریزلریمیزین امگی ایله قیاسلانا بیله جک قدر اؤنملی، دگرلی و حیاتیدیر. اوموروق کی، آمستردام توپلانتی‌سیندا، گئریچی- شووئنیست حاکیمیت و آذربایجانی سئومه ینلری سئویندیرن و یورد ایچینده کی حقیقی موباریزلریمیزی اوزن تکراری مساله لر، ایختیلافلار و آنلاشمازلیقلارین قاباردیلماسی اؤز یئرینی قارشیلیقلی آنلاییش و خوش گؤرو، ایجرایی ایش و آذربایجان میللی حرکتینی دستکله یه جک دیسپورانین اولوشماسینا وئرجکدیر.
ایللردیر کی آذربایجان میللی حرکتینین بوتون قووه لری هر دانیشیق و توپلانتیدا واحید بیر جبهه نین قورولماسینین گرکلیلیگیندن سؤز ائدیرلر آما نه یازیق کی اؤزوموزون تؤرتدیگیمیز مانعلر بو ایشه نایل اولماغین اؤنونو کسیبدیر. آذربایجان میللی دیرنیش تشکیلاتی گونئی آذربایجان گنجلیگی آراسیندا تشکیلاتچیلیق روحونون یایغینلاشدیریلماسینا اولان اینانجییلا، بیر دفعه داها لوزومسوز محفیلچیلیک و شخصیتچیلیک روحیاتینین یایغینلاشدیریلماسینا کسین شکیلده قارشی اولدوغونو بیلدیرمکله برابر، آمستردام توپلانتیسینین عرفسینده بوتون سیاسی تشکیلاتلاریمیزین ایشتیراکی ایله، اولوس‌لار آراسی حقوق و گرکلیلیکلرین چرچوسینده و البته میللی حرکتیمیزین یورد ایچینده کی اساس گؤوده و چگیردیگی‌نین گؤروشلری، ایستکلری و گرچکلری زمینینده گونئی آذربایجان واحید میللی مقاومت جبهه سی نین قورولماسی تکلیفینی تکرار ائدیر.
آذربایجان میللی دیرنیش تشکیلاتی، بوتون یورد ایچی و یورد دیشینداکی سیاسی تشکیلاتلارین تمثیل اولوندوغو گونئی آذربایجان واحید میللی مقاومت جبهه سی نین یارانماسینی و بئلجه آذربایجان میللی حرکتینی آکتیو شکیلده دستکله یه جک بیر دیاسپورانین قورولماسینی آذربایجان میللی حرکتینین باغیمسیزلیغینین قورونماسی و آذربایجان میللتینین گلجکده کی باشاریسینین تکجه یولو و قارانتی‌سی اولا‌راق گؤرمکده‌دیر.
بونونلا یاناشی آذربایجان میللی دیرنیش تشکیلاتی آچیقجا بیان ائدیر کی، آذربایجان میللی حرکتینین مرکزچی جریانلارا قارشی سیاسی ایستیقلالینی زده له یه بیلن هانسی سا سیاسی مانؤور آذربایجان میللی حرکتینین یورد ایچینده کی آتموسفری و اساس گؤوده سینه ترس دوشوب، بیر طرفدن میللی حرکت قووه لرینین ایچینده خصوصی ایله یورد ایچی و یورد دیشینداکی قووه لر آراسیندا آیریلیق و چاتلاق علتی دیگر طرفدن ایسه آذربایجانی سئومه ین و آنتی آذربایجان جریانلارا میللی حرکتین گوجو و پتانسیلینی سو ایستعمال فورصتی یارادا‌جاقدیر.
سون اولا‌راق آذربایجان میللی دیرنیش تشکیلاتی اولا‌راق آمستردام توپلانتیسینین قوران‌لاری و یؤندنلرینه باشاریلار دیله ییریک.
آذربایجان میللی دیرنیش تشکیلاتی مرکزی شوراسی
(آ م د ت)
گونئی آذربایجان
12/09/1388
