ساراوسسی : روس "حربی-کوسمیک مدافعه" ژورنالی ائتنیک موناقیشهلر، اراضی ادعالاری، ائنئرژی قایناقلارینی اله کئچیرمه موباریزهسی یا دا آیریلیقچی جریانلارین روسیانین جنوبوندا چوخ سایدا اؤلکهنین ایشتیراک ائدجگی محاربهیه یول آچا بیله جگینی ادعا ائدیب و ایچینده تورکیه نین ده یئر آلدیغی موختلیف سناریولار یایینلاییب.
حربی مؤضولاردا ان نفوذلو نشرلردن اولان و روس حربی صنایعینین فیکیرلرینی عکس ائتدیردیگی بیلینن ژورنالین سون ساییندا روسیا ایله تورکیه نی قارشی- قارشییا گتیره بیلهجک و اساساً سمادا یاشاناجاق اوچ محاربه سناریوسو حاضیرلامیشدیر. سناریولارا گؤره تورکیه، ایران، پاکیستان و افغانستان کیمی موسلمان اؤلکهلرین روسیانی قافقازدان کنارلاشدیرماق نیتی اوجباتیندان باشلایاجاق موناقیشهلره آمئریکا و ناتونون دا قوشولاجاق، موسکوایا ایسه یالنیز ائرمنیستان دستک وئرهجکدیر. ژورنالداکی سناریولار بئله قئید اولونور:
بیرینجی سناریو
آیریلیقچیلیق، تئروریزم، ائتنیک موناقیشهلر، آذربایجان اراضیلرینین ائرمنیستان طرفیندن ایشغالی پروبلئمی یا دا بؤلگهده کی مولکی روس وطنداشلارینین اؤلدورولمهسی ایله باشلایاجاق محاربهده بیر جبههده تورکیه، آذربایجان و گورجوستان، قارشی جبههده ایسه روسیا ایله ائرمنیستان ایشتیراک ائدهجک. اوچ اؤلکهنین 500-دن چوخ دؤیوش طییارهسی روسیانی قافقازدان اوزاقلاشدیرماق، اقتصادی گوجونه ضرر وئرمک و بعضی بؤلگهلرینی اله کئچرمک مقصدیله جنوب سئقمئنتلرینی 7-10 گون بویونجا آرالیقسیز بومبالایاجاق.
ایکینجی سناریو
بؤلگهدکی ائتنیک موناقیشهلر یا دا ایرانین دینی یاییلماسیندان قایناقلانان محاربهده روسیا، ایران، آذربایجان و گورجوستانلا ووروشماق مجبوریتینده قالاجاق. تخمینا 250 دؤیوش طیارهسینین قاتیلاجاغی محاربهنین بیر مقصدی ده خزرده کی نفت حوزهلرینی اله کئچیرمک اولاجاق.
اوچونجو سناریو
آیریلیقچیلیق، تئروریزم، ایتیریلن تورپاقلارین یئنیدن اله کئچریلمهسی یا دا قافقازدا مؤوقع قازانما نیتینین سبب اولاجاغی محاربهده روسیانین تک موتتفیقی ائرمنیستان اولاجاق. قارشی جبههده ایسه آمئریکانین دستکله دیگی تورکیه و گورجوستان ایشتیراک ائدهجک. محاربهیه چوخ گومان کی، آذربایجان، آیریجا قیسما اوکراینا، بولغاریستان و رومانیا قوشولاجاق. روس تورپاقلارینی میندن چوخ تورک، تورکیهده کی بازالاردان و آرالیق دنیزیندهکی طیاره گمیلریندن قالخاجاق آمئریکا و ناتو طیارهلری بومبالایاجاق، روس هاوا گوجو بیر نئچه ساعتدا یوخ ائدیلهجک. داها سونرا قورو حرکاتی باشلایاجاق، روس انئرژی قایناقلارینین داشیندیغی یولداکی بعضی شیمالی قافقاز رئسپوبلیکالاری ایشغال ائدیلهجک، ائرمنیستان تورپاقلاری اله کئچیریلهجک و بعضی اؤلکهلر خریتهدن سیلینهجک.
قئید ائدک کی، روس حربی دایرهلرینه یاخین مئدیا اؤتن ایل روسیا-گورجوستان ساواشی اؤنجهسی جنوبی قافقازا دایر بئله سناریولار ایرهلی سورموشدولر...
turkustan.biz
